غالي الوطن يمة
تفرج يبة
شمارادت اتطول
من اليمن
للبحرين
للصين
للقاهرة لبيروت
للمغرب
للسودان للجزائر
هبت ملايين الملايين
هبت مثل ما هبت الريح
الله يحرسك يا عراق
الله يحرسك يا جريح
يالماشفت راحة بحياتك
من فتحت عينك ولليوم
فتن وحروب مطوقاتك
يابو المآسي اتوكل وكوم
طايح عقل من رادك اتطيح
وانت البحر والشمس والريح
لليوم ما مات الحسين
ولليوم ما مات المسيح
دللول
غالي الوطن يمة
تفرج يبة
شمارادت اتطول
يقولون اغانيكم حزينة
هو احنا يا عمي شبيدينا
من ادم ولليوم واحنا
دم تمطر الدنيا علينا
كل يوم فايض بينا طوفان
كل يوم غركانة السفينة
اتوارثنا من نوح السفينة
وفوك الخناجر نمشي حفاي
وانغني عزة نفس بينا
دللول
غالي الوطن يمة
تفرج يبة
شمارادت اتطول
يا ونة الونيتها
جمر حراك
ونة امفارك شيبه الفراك
شنهو الجنيناه من ذنب يعراك
يقولون تصفى
واكول الله يصفيها
شفنا اللي ماشافه بشر يا زمان
شايف عراقي سلم من خنجر الاحزان؟
اتفرهدنا والله وتوزعنا على البلدان
وذل كم عزيز النفس لاوين تاليها
اعطش وبيتي نهر
اعرى وبلادي ذهب
اشحذ وانا الملك
انداس وانا الغضب
انكاد وانا السبع
اشعندك بعد يا عجب
ياما نزفنا دمى
وياما كتمنا غضب
كل شدة الها فرج
لتموت لا يا شعب
دللول
غالي الوطن يمة
تفرج يبة
شمارادت اتطول
دمعة على وطن العراق
وماعندي غير الدمعة موقف
مانامت عيوني ولا تنام
مادام وطني الغالي ينزف
وماداموا اطفاله ضحايا
قلبي ابحضن زلزال يرجف
دللول
غالي الوطن يمة
تفرج يبة
شمارادت اتطول
هذا العراق الله جمع بيه
رمضان والمندى والقداس
طه ويسوع وعرب واكراد
اديان قوميات اجناس
يابو الحسن ياعلي الكرار
يالحمزة يالكاظم يا عباس
يابو حنيفة يكيلاني
عائلة وحدة ووطن واحد
ونوم الحبايب راس ضم راس
قل اعوذ صلينا لوطننا
من شر كل وسواس خناس
دللول
غالي الوطن يمة
تفرج يبة
شمارادت اتطول
للشاعر كريم العراقي
الثلاثاء يناير 15, 2008 5:41 am
